íslenskir karlmenn

Ég get ekki stillt mig um að blogga aðeins um handboltann.  Það er yndislegt að fylgjast með "strákunum okkar" vera hyllta í Reykjavík við komuna heim eftir silfuverðlaun á Ólympíuleikunum.

Ég er ekki frá því að íslenska þjóðin sé að læra dálítið af þessu ævintýri.  Stór íþróttamót eins og ólympíuleikar gegna ýmsum hlutverkum og eitt af þeim er að efla samstöðu innan þjóða sem sameinast um að styðja sitt íþróttafólk til þátttöku og vonandi árangurs í sínum greinum.

Íslendingar eiga það til að vera svolítið fínir með sig og stoltir og tilfinningar berum við helst ekki á torg.  Það hefur einhvern veginn aldrei verið kúl á Íslandi að vera mikið að opinbera gleðir sínar og sorgir.

Nú eru margir sem gagnrýna Þorgerði fyrir að bruðla með peninga og keppa við forsetafrúnna um athygli.  Eflaust á eftir að býsnast dálítið yfir kostnaðinum við móttökuhátíðina.  Ég er fegin að íþróttamálaráðherra tekur þetta ekki nærri sér og heldur ótrauð áfram að styðja strákana.  Mér finnst hún hafa staðið sig vel í að styðja strákana af heilum hug og frá hjartanu og maður sér hvað hún gleðst innilega. 

Ólafur Stefánsson er mitt uppáhald og er ég líklega ekki ein um þá skoðun.  Að öðrum ólöstuðum finnst mér hann vera hjartað í liðinu og uppspretta árangurs liðsins kemur greinilega að stórum hluta frá honum.   

Hann hefur sýnt fram á það að íslenskir karlmenn geta grátið, faðmast, glaðst og verið vonsviknir á sama tíma og þeir eru sterkir sigurvegarar.  Þegar hann segir að Íslendingar eigi að keppast við sjálfa sig frekar en við hverja aðra, hittir hann í mark, eins og venjulega.  Mér finnst þetta góð skilaboð frá landsliðsfyrirliðanum til þjóðarinnar á þessum degi.

Gott silfur er gulli betra.

Jóhanna og FH - Fossvogsmeistarar í fótbolta

 

sætir strákar í Reykjavíkurmaraþoninu í dag

Landsskipulag - epli og appelsínur

Eftir því sem ég kemst næst er 10. greininni í frumvarpinu um skipulagslög ætlað að gefa ríkisvaldinu ákvörðunarvald yfir stóriðju og virkjanamálum á Íslandi.  Skipulagsvaldið er alfarið á hendi sveitarfélaganna og sýnist mörgum að illa stödd sveitarfélög úti á landi eigi ekki að taka jafn afdrifaríkar ákvarðanir sem varða þjóðina alla.

Því er ég sammála, það er ófært að ríkisvaldið geri samninga á alþjóðavettvangi sem það hefur svo engin verkfæri til að standa við.

Samband sveitarfélaga hefur lagst gegn 10. greininni í frumvarpinu sem varðar landsskipulag og er því málið strand í þingflokkum ríkisstjórnarflokkana.

það er alveg hægt að skilja að sveitarfélögin vilji ekki láta frá sér skipulagsvaldið yfir sínum eigin haga.

En ég velti því fyrir mér hvort ekki sé verið að blanda saman eplum og appelsínum hér.  Ef það er loftið sem ríkisvaldið vill ráða yfir þá er ég ekki endilega viss um að það sé túnið sem það þarf að setja undir sína lögsögu.

Ríkisvaldið vill ráða yfir eplunum og sveitarfélögin appelsínunum.  Þetta ætti vel að vera mögulegt.  Mér dettur í hug að verkfærið losunarheimildir og heilbrigðiseftirlit sem úthlutar kvótum og er á forræði ríkisstjórnarinnar geti tryggt farsælan feril þessara mála.

Stór mál á stuttu þingi

hjón, hundur og haf

hundur og haf

nokkuð til í þessu

Roseanne hefur kjaftinn fyrir neðan nefið.  Ég er ekki frá því að þessi reiðilestur hennar eigi einhvern rétt á sér.  Hvort henni kemur þetta eitthvað við er kannski önnur saga auk þess sem deila má um aðferðina sem hún notar.

Roseanne ræðst á Angelinu Jolie

Heilagleiki Framsóknar

Framsóknarkonan Marsibil Sæmundardóttir hefur óbeit á vinnubrögðum sem Sjálfstæðisflokkurinn stundar og ætlar að starfa utan meirihlutans í borginni.  Þó segist hún ætla að starfa áfram og ekki fella meirihlutann fái hún tækifæri til þess.  Hvernig hún ætlar að fara að þessu verður spennandi að sjá. Já framsóknarmönnum er ekki fisjað saman, svo mikið er víst. 

Leoncie - í kópavogi

Einu sinni var til lag með indversku prinsessunni Leoncie sem snerist um kópavog. Mig vantar þetta lag helst fyrir morgundaginn ef einhver getur bent mér á hvar það er að finna yrði ég mjög þakklát!

beina brautin

Nú er leiðin  bein og greið fyrir Obama.  Ég hefði viljað sjá hann velja Hillary fyrir varaforseta en það er vel hægt að skilja að hann geti ekki verið með Bill Clinton sem varavaraforseta, hann er jú einn af áhrifamestu mönnum veraldar. 

Það er engin raunveruleg samkeppni frá McCain, hann nær engu flugi í kosningabaráttu sinni, auglýsingaherferðir hans sem ganga út á að gera lítið úr Obama hafa haft öfug áhrif. 

Þegar maður hlustar á Jay Leno og sér umfjallanir um McCain er ekki verið að fjalla um annað en aldur hans.  Það er eiginlega frekar fyndið.

 

Clinton berst fyrir Obama